Die Mafferschdorfer
Fohrt, die wur
dan Sunntsch nouch Pfingst'n jedes Juhr,
denn unsre Korche wur geweiht
dr Heiligst'n Dreifaltigkeit.
(Natierlich wiss'n dos
noch olle.
Ich will's aber ei jed'n Folle
fr die, die nouch uns kumm, notier'n,
die word's vielleicht ou intressier'n.)
Frieh tot mr orscht
eis Huchomt gieh'n,
drnou noch beieinander stieh'n,
dann mußte mr os Ass'n denk'n,
de Schriete wieder hejmwärts lenk'n.
Nouch zwejns dou
ging's dann wieder fort
zun Festplotze ban Kino dort.
De Musik hort' mr schun vo weit'n
und soug dan Rumm'l ou beizeit'n:
De Schauk'l, 's
Karussell mit Fohne
und vis-a-vis de Geisterbohne,
de Schießbud'n und Kinderfrejd'n,
halt lauter gude Gelegenhejt'n
em ou sei Gald gut
ozubreng'.
Dou mußte sich gor niemand dräng'.
's wur oll's gemietlich und gedieg'n.
A Zorkus mit dressiert'n Zieg'n,
en Ponny, Akrobat'n,
Hund'n,
dar hotte sich ou eigefund'n,
em seine Künste vierzufiehr'n
und 's Publikum zu faszinier'n.
Grunzte enn
zwisch'nnei dr Mag'n,
dou brauchte kenner zu verzag'n,
denn viergesorgt wur vorn und hint'n,
mr mußte ock sei Gusto find'n.
Ne weit vun Hause o dr
Ecke
dou stond jed's Juhr dr Hensch'l- Bäcke,
wos gob's dou ne oll's auszusuch'n:
Eis und Schmierroll'n, Torte, Kuch'n.
A Stickl wetter soug
mr stets
'n tork'schn Honigmon mit Fez.
Und war ban'n koufte, krichte glei
sen'n Honig eis Popierdl nei.
's gob frische
Korsch'n, Zuckerwotte,
wenn jemand Oppetit druf hotte,
vo hejß'n Worschtln ne zu red'n,
die wor'n ja bale wos fr jed'n.
Dos wor a buntes Lab'n,
Treib'n,
doch leider konnte 's ne su bleib'n,
denn finf'nfortsch wor olles aus,
mr mußt'n weg, ei d' Fremde naus.
De Fohrt aber labt ei
uns fort,
und sein mr jetz' ou nemieh dort,
su fiehrt se uf Neu-Gablonz heute
dan Sunntsch nouch Pfingst'n ihre Leute.