Zuorscht dou ging's
an Kindergortn,
Wundrak Fritzi, Kinderfest,
Märchen, Spielzeug olle Ortn,
was sich ock su denkn läßt.
Dann ging's ei de
orschte Klasse
mit Fibl, Buntstiftn und Jause,
mr lernte ane ganze Masse
und frejte sich uf jede Pause.
Mr worn ganz
ufgeweckte Kreppe,
Jung' und Madl hibsch sortiert,
und hott'n unse ejgnen Keppe,
ols hätt'n mr die Zukunft g'spiert,
die reserviert wur
fr uns Wichte
ei Deutschland und ou ei dr Walt.
Dr Stund'nzeiger dr Geschichte
wur längst schun dou druf eigestallt.
Noch wur uns olles
dos vrborg'n,
de Walt vull Wunder, Spielerei.
Mr liff'n ohne Angst und Sorg'n
ei unser junges Lab'n nei.
Mit elfe mußt'n mr
eis Theater,
Oper, Lost- und Trauerspiel
ging'n fr uns ieber de Brater,
denn uf Bildung hilt mr vill.
Drweil ging's wetter
dorch de Klass'n,
Ernst und Frejde gut gemischt.
Monches hot mr ja vrgass'n,
aber dos macht worklich nischt.
Denn sahn mr uns
jetz wieder heute,
Polmsonntagstraff'n, dou und dort,
aus Kindern wurn ja stromme Leute,
dou trojn uns de Gedank'n fort
noch Mafferschdorf
und ei de Schule
zu Bledsinn, Lehrern, Katechet,
de Keppe sein ja noch su vule,
wenn sich's em unse Schulzeit dreht.
Dou kimmt dann olles
uf de Plotte,
Ernst, Jux und's Klassenorginal,
und wos sich sunst ereignet hotte
ei Mafferschdorf vu dazumal.
Mr red'n ou vo
andern Stund'n,
Fortgiehn, Gefang'nschoft und Flucht,
und wie a jed's sen Plotz gefund'n,
da se vull Hoffnung hon gesucht.
