's wuar ai Neurode, enn siebndreischger Juahr,
zu darar Zeit ich noch a klintscher Junge wuar.
Dou koam d'r Unkl Franz und soite zu mir:
"Mit'm Auto fohrn, kemmt bei uns ne ofte vir,
abr wenn de mit willst, ich load dich dozu ei.
M'r fohrn morne ei d' Stoadt drmit nei.
denn m'r hon Toufe, 's word dich sicher frein,
muβt halt em noine bei uns dremm sein."

Ab'r de Mutter soate: "Schloi d'rs aus'm Sinn,
denn morne muβt du ei de Schule giehn."
No, ihr kennt euch vierstelln, woas ich dochte,
als ich anderntags mich uf'n Schulwaig machte.
Oh, Jessas, a schwoarze Fohne hing dou raus,
und d'r Peppi, uns'r Liehrer stoand vur'm Haus.
"Hoite is kejne Schule, ihr kennt wieder giehn,
denn ei d'r Zeitung tut's drenne stiehn,
doaβ d'r ALtpräsident is gestorbn ai Prag,
und desdrwajgn is hoite a Trauertag."

Dou v'rzoug mr's euch vor Frejde doas Gesichte,
und ich dochte, doas is ejne schiene Geschichte.
Jetz toat aus dar Autoreise doch noch woas war'n,
denn jetz konntsch noch mit zu d'r Toufe fahr'n.
Hejmgerannt bin'ch, de Mötze geschwenkt wie wild.
Ihr kennt euch vierstell'n, doas woar ej Bild.
Und g'schrien hoa'ch, daβ ou a jeder hieren tut:
"Hurra, uns'r Präsident, d'r Masaryk is tut!"